ఇరాన్ తో చర్చల కోసం పాకిస్థాన్ వెళ్లొద్దు.. అమెరికా బృందానికి ట్రంప్ ఆదేశం

అమెరికా అధ్యక్షుడు డొనాల్డ్ ట్రంప్ సంచలన నిర్ణయం తీసుకున్నారు. ఇరాన్‌తో చర్చల నిమిత్తం తమ ప్రతినిధుల బృందం పాకిస్థాన్‌లోని ఇస్లామాబాద్‌కు వెళ్లాల్సి ఉండగా, ఆ పర్యటనను రద్దు చేస్తున్నట్లు శనివారం ప్రకటించారు. చర్చల కోసం అంత దూరం ప్రయాణించడం సమయం వృథా అని, వాళ్లు మాట్లాడాలనుకుంటే ఫోన్ చేస్తే సరిపోతుందని ఆయన స్పష్టం చేశారు.

ఈ మేరకు తన సోషల్ మీడియా ప్లాట్‌ఫామ్ 'ట్రూత్ సోషల్'లో ఆయన ఒక పోస్ట్ పెట్టారు. "ఇరాన్‌తో సమావేశం కోసం ఇస్లామాబాద్ వెళుతున్న నా ప్రతినిధుల పర్యటనను ఇప్పుడే రద్దు చేశాను. ప్రయాణంతో సమయం వృథా అవుతుంది. ఫలితం లేని చర్చల కోసం అంత దూరం వెళ్లడం అనవసరం. పైగా, ఇరాన్ నాయకత్వంలో తీవ్ర గందరగోళం, అంతర్గత కుమ్ములాటలు ఉన్నాయి. ఎవరి చేతిలో అధికారం ఉందో వారికే తెలియదు" అని ట్రంప్ వ్యాఖ్యానించారు.

అయితే, అమెరికా ప్రతినిధులతో నేరుగా సమావేశమయ్యే ప్రణాళిక ఏదీ లేదని ఇరాన్ ముందుగానే స్పష్టం చేసింది. పాకిస్థాన్ మధ్యవర్తిత్వంతోనే తమ అభిప్రాయాలు తెలియజేస్తామని చెప్పింది. ఈ ప్రకటన తర్వాత ఇరాన్ విదేశాంగ మంత్రి అబ్బాస్ అరగ్చి నేతృత్వంలోని బృందం పాకిస్థాన్ నుంచి బయలుదేరి వెళ్లిపోయింది. ఈ పరిణామాల తర్వాతే ట్రంప్ తన నిర్ణయాన్ని ప్రకటించడం గమనార్హం.

"అన్ని అస్త్రాలు మా చేతిలోనే ఉన్నాయి, వాళ్ల చేతిలో ఏమీ లేదు. ఒకవేళ వాళ్లు మాట్లాడాలనుకుంటే, చేయాల్సిందల్లా ఒక్క ఫోన్ కాల్ మాత్రమే!" అని ట్రంప్ తన పోస్టులో ఘాటుగా పేర్కొన్నారు. ఈ చర్చల కోసం అమెరికా తరఫున ట్రంప్ అల్లుడు జారెడ్ కుష్నర్‌, ప్రత్యేక రాయబారి స్టీవ్ విట్‌కాఫ్ వెళ్లాల్సి ఉంది. తాజా పరిణామంతో ఇరు దేశాల మధ్య ఉద్రిక్తతలను తగ్గించేందుకు జరుగుతున్న మధ్యవర్తిత్వ ప్రయత్నాలకు తాత్కాలికంగా బ్రేక్ పడినట్లయింది.